ترقی پسند پاکستان کیلئے قائد کے وژن پر عمل کرنا ہوگا، دشمن مذہبی ،نسلی، سیاسی کمزوریوں کو استعمال کرکے دراڑیں ڈالنا چاہتا ہے ہمیں مضبوط ،پرعزم قوم کے طور پر ابھرنے کیلئے متحد ہونا ہوگا، آرمی چیف

آرمی چیف جنرل سید عاصم منیر نے کہا ہے کہ پاکستان کے دشمن مذہبی، نسلی

 اور سیاسی کمزوریوں کو استعمال کرکے قوم کے درمیان ڈراریں ڈالنے پر تلے ہوئے ہیں اور ملک کو درپیش چیلنجز اور مسائل سے نمٹنے کے لیے ہمیں بیان بازی اور پروپیگنڈ ے کی نفی کرنا ہوگی۔پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ آرمی چیف نے کرسمس کی تقریبات میں شرکت کے لیے کرائسٹ چرچ راولپنڈی کا دورہ کیا اور مسیحی برادری کے ساتھ کرسمس تقریبات میں شرکت کی۔ترجمان پاک فوج کے مطابق اس موقع پر چرچ انتظامیہ نے آرمی چیف کا خیر مقدم کیا اور تہوار میں شرکت پر شکریہ ادا کیا۔آئی ایس پی آر نے کہا کہ آرمی چیف نے پاکستان میں مقیم تمام مسیحی برادری کو کرسمس کی مبارکباد دی۔ پاک فوج سربراہ نے مذہبی برادری کےلیے احترام کا اظہار کرتے ہوئے کہا کہ ترقی پسند پاکستان کے لیے قائد کے حقیقی وژن پر عمل کرنےکی ضرورت ہے۔ آرمی چیف نے معاشرے میں بین المذاہب ہم آہنگی کو فروغ دینے پر بھی زور دیا۔سپہ سالار نے کہا کہ اسلام ہمیں محبت اور دوستی کا سبق سکھاتا ہے، اسلام بین المذاہب ہم آہنگی کی حوصلہ افزائی کرتا ہے جو وقت کی اہم ضرورت ہے۔ جنرل سید عاصم منیر نے کہا کہ پاکستان کے دشمن مذہبی، نسلی اور سیاسی کمزوریوں کو استعمال کرکے ڈراریں ڈالنے پر تلے ہیں اور ہمیں مضبوط، پرعزم قوم کے طور پر ابھرنےکے لیے متحد اور یکجان ہونا ہو گا۔ترجمان پاک فوج نے کہا کہ آرمی چیف نے پاکستان کی مسیحی برادری کی خدمات،قربانیوں کا بھی اعتراف کیا۔